iii මිහිඳු මහ රහතන් වහන්සේ ස්වර්ණමාලි මහා සෑ රජාණන් වහන්සේගේ අතීත සහ අනාගත කතා විස්තරය කිරීම

මිහිඳු මහ රහතන් වහන්සේ ස්වර්ණමාලි මහා සෑ රජාණන් වහන්සේගේ අතීත සහ අනාගත කතා විස්තරය කිරීම 

මිහිඳු මහා රහතන් වහන්සේට මගේ නමස්කාරය වේවා...... 

එඳා පොසොන් පෝය දවස. අපගේ මිහිඳු මහා රහතන් වහන්සේ මේ ලංකාද්වීප වැසියන් ගැන බොහෝ අනුකම්පාවෙන් මිස්සක පව්වට වැඩම කළා. මිහිඳු මහා රහතන් වහන්සේ වැඩම කළේ තමන්ගේ ශිෂ්‍ය රහතන් වහන්සේලා සතර නමත්, සුමන සාමනේරයන් හා භණ්ඩුක උපාසකතුමා කැටුවයි. මේ පිරිස අතර හිටිය සුමන සාමනේරයන් වහන්සේ හරීම ඉර්ධිමත්. අපගේ මිහිඳු මහා රහතන් වහන්සේ ථූපාරාම සෑයේ නිධන් කරන්න අප බුදුරජාණන් වහන්සේගේ දකුණු අකු ධාතුන් වහන්සේ දෙව්ලොවට වැඩම කරලා සක් දෙවිඳුගෙන් ඉල්ලා ගෙන එන්න යැවුවෙත් සුමන සාමනේරයන් වහන්සේ. ඒ වගේම ඒ අතර සිටි භණ්ඩුක උපාසකතුමාත් අනාගාමී කෙනෙක්. ගිහි උපාසකතුමා මෙහි කැඳවා ගෙන එන්නේ මේ මිස්සක පව්වේ වැඩ ඉන්නේ මනුෂ්‍යයන් බව පෙන්වා දෙන්ටයි. මිස්සක පව්වේ අම්බස්ථල ගල් කුල මත වැඩ සිටියේ මිහිඳු මහා රහතන් වහන්සේයි. මිහිඳු මහා රහතන් වහන්සේ මෙහි වැඩම කරන කලේ ලංකාද්වීපයේ රජකම් කලේ දේවානම්පිය තිස්ස රජතුමයි. දේවානම්පිය තිස්ස රජතුමා දඹදිව රජකම් කරපු ධර්මාශෝක රජතුමා ගේ මිතුරෙක්. ධර්මාශෝක රජතුමා ලංකාද්වීපයට හරිම හිතවත් රජ කෙනෙක්. තමන්ගේම පුතාවනේ එව්වේ ධර්මය මේ ධරණී තලයේ පිහිටුවන්න. එඳා දේවානම්පිය තිස්ස රජතුමා මිහිඳු මහා රහතන් වහන්සේගෙන් බණ ආසා පැහැදිලා තෙරුවන් සරණ ගියා. ඒදා පටන් තමයි මේ සිංහලද්වීපයේ බුදු සුවඳ, දහම් සුවඳ, සඟ සුවඳ පැතිරුනේ.

මේ ලංකාද්වීපයේ සම්බුද්ධ ශාසනය පිහිටවුයේ මිහිඳු මහා රහතන් වහන්සේ. අධර්මයෙන් ලක්වාසීන් මුදවලා ධර්මයට මිනිසුන් පමුණුවලා ලංකාවේ සම්බුද්ධ ශාසනය පිහිටවුයේ මිහිඳු මහා රහතන් වහන්සේ. අද අපි බණ පදයක් අහන්නේ අප භාග්‍යවතුන් වහන්සේගේ ගුණ දකින්නේ ඒදා භාග්‍යවතුන් වහන්සේ වදාල මාර්ගයේ ගමන් කළ මිහිඳු මහා රහතන් වහන්සේට පින්සිඳුවන්නටය.

දේවානම් පිය තිස්ස රජතුමාට මිහිඳු මහා රහතන් වහන්සේ අනාගතයේ ඉඳිවන මහා සෑය ගැන වදාලා. දේවානම් පිය තිස්ස කියන්නේ දෙවියන්ට ප්‍රිය වු තිස්ස කියන තේරුම. දවසක් මිහිඳු මහා රහතන් වහන්සේ වැඩම කරනවා රජ ගෙදර ඉහළ දකුණු පැත්තට. අපේ දෙවනම් පිය තිස්ස රජතුමත් සපුමල් පුදමින් අසළින්ම ගමන් කරනවා. මිහිඳු මහා රහතන් වහන්සේ මහා සෑය පිහිටුවන භූමියට වැඩම කරනවා. රාජ පුරුෂයෙක් ඇවිත් සපුමල් මිටක් රජතුමා අත තැබුවා. රජතුමා මිහිඳු මහා රහතන් වහන්සේට සපු මල් මිට පිළිගැන්නුවා.  මිහිඳු මහා රහතන් වහන්සේ සපු මල් මිට උස් බිම් කඩට පුජා කරනවා. එතනදී මහා පොළොව කම්පා වුනා.  රජතුමා  අහනවා "ස්වාමීනී, මහ පොළොව කම්පා වීමට හේතුව කිම.". මිහිඳු මහා රහතන් වහන්සේ වදාලා " රජතුමනි, මේ භුමිය මේ මහා භද්‍ර කල්පයේ පහල වු සතර බුදුරජාණන් වහන්සේලාගේ පා පහස ලඳ පුන්‍ය භූමියක්. සතර බුදුරජාණන් වහන්සේලා මහ රහතුන් පිරිවරා නිරෝධ සමාපත්ති සුවයෙන් වැඩ සිටි භූමියක්. මහා සෑයකට ඉතාමත් සුදුසුයි". "රජතුමනි, මේ මහා සෑය එක්සිය විසි රියනක් උසයි. අප භාග්‍යවතුන් වහන්සේගේ ද්‍රෝණයක් ධාතුන් වහන්සේලා මෙහි වැඩ සිටිනවා. දෙව් මිනිස් ලෝකය තුල ස්වර්ණමාලී නමින් ප්‍රකට වෙනවා." කියා වදාලා. එවිට දේවානම් පිය තිස්ස රජතුමාට සිතුනා මේ මහා සෑය මම කරවන්න ඕන කියලා. මිහිඳු මහා රහතන් වහන්සේ රජතුමා ට වදාරනවා " රජතුමනි, ඔබට කළ යුතු තව වැඩ කට‍යුතු තව බොහෝමයි. මේ මහා සෑය තනන්නේ අනාගතේ ඔබේ මුනුබුරෙක් වන ගාමීණී අභය රජතුමා. මහානාම යුව රජුට ඉපදෙනවා යටාලතිස්ස නමින් පුත් කුමරෙක්. ඒ යටලතිස්ස රජතුමාගේ පුත් කුමාරයා තමයි ගෝඨාභය. ඒ රජතුමාට පුත් කුමාරයෙක් ලැබෙනවා කවන්තිස්ස. මේ කවන්තිස්ස රජතුමා රුහුනේ මාගම රජකම් කරනවා. එතුමගේ පුත් කුමරයා තමයි ගාමීණී අභය". 

මේ විස්තරය අසා දේවානම්පියතිස්ස රජතුමා මේ විස්තරය ලියපු ගල් ටැඹක කොටලා මේ මහා සෑය පිහිටන භූමියේ මධ්‍යයේ පිහිටුවනවා. මේ කරුණ රන් පතක ලියලා රජ වාසලේ කරඞුවක තැන්පත් කරනවා. මේ ආකාරයට තමයි මිහිඳු මහා රහතන් වහන්සේ දේවානම්පියතිස්ස රජතුමාට අනාගතයේ ඉදිවන මහා සෑය ගැන විස්තර කරන්නේ.

දේවානම්පියතිස්ස රජතුමා ශාසනය වෙනුවෙන් බොහෝ කටයුතු කරනවා. ථුපාරාම සෑය හදන්නේ එතුමා. අප අප භාග්‍යවතුන් වහන්සේගේ අකු ධාතුන් වහන්සේ තැන්පත් කොට තමයි ථුපාරාම සෑය හදන්නේ. අකු ධාතුන් වහන්සේ ථුපරමයට ලැබෙන්න කලින් දෙව් ලොව සක් දෙවිඳු ලඟ තමයි වැඩ ඉන්නේ. දෙවියන්ට ප්‍රිය වු දෙවනම් පිය තිස්ස රජතුමා එලෙස රාජ්‍ය විචාලා.

මිහිඳු මහ රහතන් වහන්සේ ස්වර්ණමාලි මහා සෑ රජාණන් වහන්සේගේ අතීත සහ අනාගත කතා විස්තරය කිරීම  නිමි.

පිවිසෙන්න    https://dtravel2017.wordpress.com/